1ܘܩܲܡ ܡܲܚܙܹܐ ܠܝܼ ܢܲܗܪܵܐ ܕܡ̈ܝܼܵܐ ܚܵܝܹ̈ܐ ܨܸܦܝܵܐ ܐܲܝܟܼ ܩܪܸܣܛܹܠܘܿܣ؛ ܕܒܸܦܠܵܛܵܐ ܡ̣ܢ ܬܪܘܿܢܘܿܣ ܕܐܲܠܵܗܵܐ؛ ܘܕܦܹܪܵܐ؛ 2ܒܒܹܝܦܲܠܓܵܐ ܕܥܵܠܘܠܵܐ ܦܸܬܝܵܐ ܕܝܼܵܗ̇. ܘܥܲܠ ܢܲܗܪܵܐ ܡܐܵܗܵܐ ܓܹܒܵܐ ܘܡܗ̇ܘ ܓܹܒܵܐ؛ ܐܝܼܠܵܢܵܐ ܕܚܲܝܹ̈ܐ؛ ܕܡܵܐܘܹܐ ܬܪܸܥܣܲܪ ܛܥܘܼܢܝܵܬܹ̈ܐ؛ ܕܒܟܠ ܝܲܪܚܵܐ ܒܝܼܵܗ݇ܒܼܵܐ ܟܠ ܚܕܵܐ ܛܥܘܼܢܬܵܐ ܕܝܼܹܗ. ܘܛܲܪ̈ܦܹܐ ܕܩܲܝܣܵܐ ܠܗܲܟܝܼܡܘܼܬܵܐ ܕܡܸܠܲܬܹ̈ܐ. 3ܘܟ̰ܘܼ ܠܵܘܛܬܵܐ ܠܹܐ ܗܵܘܝܵܐ ܡܸܢَܕܪܸܫَ. ܘܬܪܘܿܢܘܿܣ ܕܐܲܠܵܗܵܐ ܘܕܦܹܪܵܐ ܓܵܘܵܗ̇ ܒܸܬ ܗܵܘܝܵܐ؛ ܘܪܹ̈ܓܵܘܵܬܘܼܗܝ ܒܸܬ ܥܵܒܼܕܝܼ ܠܹܗ ܚܸܠܡܲܬ؛ 4ܘܒܸܬ ܚܵܙܝܼ ܦܵܬܹܗ؛ ܘܫܸܡܹܗ ܥܲܠ ܩܸܨܵܝ ܝܠܹܗ. 5ܘܠܲܝܠܹܐ ܐَܚܹܪَܢܵܐ ܠܹܐ ܗܵܘܹܐ ܬܵܡܵܐ؛ ܘܠܲܝܬ ܠܗ݇ܘܿܢ ܣܘܼܢܩܵܢܵܐ ܕܒܲܗܪܵܐ ܕܫܪܵܝܵܐ؛ ܘܕܒܲܗܪܵܐ ܕܫܸܡܫܵܐ؛ ܣܵܒܵܒ ܡܵܪܝܵܐ ܐܲܠܵܗܵܐ ܒܸܬ ܒܲܗ݇ܪܸܢ ܐܸܠܵܝܗܝ؛ ܘܒܸܬ ܥܵܒܼܕܝܼ ܡܲܠܟܘܼܬܵܐ ܠܥܵܠܡܹ̈ܐ ܕܥܵܠܡܹ̈ܐ. 6ܘܐَܡܝܼܪܹܗ ܐܸܠܝܼ؛ ܐܲܢܹܐ ܗܹܡܸܙܡܵܢܹ̈ܐ ܡܗܘܼܡܢܹ̈ܐ ܘܫܲܪܝܼܪܹ̈ܐ ܝܢܵܐ. ܘܡܵܪܝܵܐ؛ ܐܲܠܵܗܵܐ ܕܢܒܼ̈ܝܼܹܐ ܩܲܕܝܼܫܹ̈ܐ؛ ܫܘܼܕܸܪܹܗ ܠܡܲܠܲܐܟܼܹܗ ܠܡܲܚܙܘܼܝܹܐ ܠܪܹ̈ܓܵܘܵܬܘܼܗܝ ܐܲܢܹܐ ܕܝܼܢܵܐ ܘܵܓ̰ܸܒ ܠܸܗܘܵܝܵܐ ܓ̰ܲܠܕܹܐ. 7ܘܗܵܐ؛ ܒܹܐܬܵܝܵܐ ܝܘܸܢ ܓ̰ܲܠܕܹܐ. ܛܘܼܒܼܵܢܵܐ ܝܠܹܗ ܗ̇ܘ ܕܢܵܛܸܪ ܠܗܹܡܸܙܡܵܢܹ̈ܐ ܕܢܒܼܝܼܘܼܬܵܐ ܕܐܵܗܵܐ ܟܬܵܒܼܵܐ. 8ܘܐܵܢܵܐ ܝܘܿܚܲܢܵܢ ܝܼܘܸܢ ܗ̇ܘ ܕܫܡܸܥܠܹܗ ܘܚܙܹܐ ܠܹܗ ܐܲܢܹܐ. ܘܟܲܕ ܫܡܸܥܠܝܼ ܐܵܢܵܐ ܘܚܙܹܠܝܼ؛ ܢܦܸܠܝܼ ܠܸܣܓܼܵܕܵܐ ܩܵܕ݇ܡ ܐܲܩܠܹ̈ܐ ܕܡܲܠܲܐܟܼܵܐ ܕܐܲܢܹܐ ܡܲܚܙܘܼܝܹܐ ܗ݇ܘܵܐ ܐܸܠܝܼ. 9ܘܐَܡܝܼܪܹܗ ܐܸܠܝܼ؛ ܚܙܝܼ؛ ܠܵܐ. ܚܲܒܼܪܵܐ ܕܝܼܘܼܟ ܝܼܘܸܢ ܒܚܸܠܡܲܬ؛ ܘܕܐܵܚܘܿܢܘܵܬܘܼ̈ܟܼ ܢܒܼ̈ܝܼܹܐ؛ ܘܕܐܵܢܝܼ ܕܢܵܛܪܝܼ ܠܗܹܡܸܙܡܵܢܹ̈ܐ ܕܐܵܗܵܐ ܟܬܵܒܼܵܐ؛ ܠܐܲܠܵܗܵܐ ܣܓܼܘܿܕ. 10ܘܐَܡܝܼܪܹܗ ܐܸܠܝܼ؛ ܠܵܐ ܚܬܘܿܡ ܠܗܹܡܸܙܡܵܢܹ̈ܐ ܕܢܒܼܝܼܘܼܬܵܐ ܕܐܵܗܵܐ ܟܬܵܒܼܵܐ؛ ܣܵܒܵܒ ܕܙܲܒܼܢܵܐ ܩܘܼܪܒܵܐ ܝܠܹܗ. 11ܗ̇ܘ ܕܥܵܘܵܠܵܐ ܝܠܹܗ؛ ܗܲܪ ܥܵܒܼܸܕ ܥܵܘܠܵܐ؛ ܘܗ̇ܘ ܕܝܼܠܹܗ ܫܸܚܬܵܢܵܐ؛ ܗܲܪ ܦܵܝܸܫ ܫܸܚܬܵܢܵܐ؛ ܘܗ̇ܘ ܕܝܼܠܹܗ ܙܲܕܝܼܩܵܐ؛ ܗܲܪ ܙܲܕܝܼܩܘܼܬܵܐ ܥܵܒܼܸܕ؛ ܘܗ̇ܘ ܕܝܼܠܹܗ ܩܲܕܝܼܫܵܐ؛ ܗܲܪ ܦܵܝܸܫ ܡܩܘܼܕܫܵܐ. 12ܗܵܐ؛ ܒܹܐܬܵܝܵܐ ܝܘܸܢ ܓ̰ܲܠܕܹܐ؛ ܘܗܵܩܝܼ ܥܲܡܝܼ؛ ܠܸܦܪܲܥܝܵܐ ܠܟܠ ܚܲܕَ ܐܲܝܟܼ ܕܗܵܘܹܐ ܦܘܼܠܚܵܢܹܗ. 13ܐܵܢܵܐ ܝܘܸܢ ܐܵܠܲܦ ܘܬܵܘ؛ ܩܵܕ݇ܡܵܝܵܐ ܘܐَܚܵܪܵܝܵܐ؛ ܫܘܼܪܵܝܵܐ ܘܫܘܼܠܵܡܵܐ. 14ܛܘܼܒܼܵܢܹ̈ܐ ܝܢܵܐ ܐܵܢܝܼ ܕܚܘܼܠܸܠܘܿܢ ܐܸܣܛܠܵܝ̈؛ ܕܗܵܘܹܐ ܠܗ݇ܘܿܢ ܕܲܣܬܘܼܪ ܥܲܠ ܩܲܝܣܵܐ ܕܚܲܝܹ̈ܐ؛ ܘܕܐܵܘܪܝܼ ܒܕܲܪ̈ܙܘܵܙܹܐ ܓܵܘ ܡܕܝܼܢ݇ܬܵܐ. 15ܠܒܼܲܕܲܪ ܟܲܠܒܹ̈ܐ؛ ܘܚܲܪ̈ܵܫܹܐ؛ ܘܙܲܢܵܝܹ̈ܐ؛ ܘܩܵܛܘܿܠܹ̈ܐ؛ ܘܣܵܓܼܕܵܢܹ̈ܐ ܕܨܵܢܲܡܹ̈ܐ؛ ܘܟܠ ܕܡܲܚܸܒ ܘܥܵܒܼܸܕ ܕܵܓܵܠܘܼܬܵܐ. 16ܐܵܢܵܐ ܝܼܫܘܿܥ ܫܘܼܕܸܪܝܼ ܠܡܲܠܲܐܟܼܝܼ ܠܝܼܵܗ݇ܒܼܵܐ ܣܵܗܕܘܼܬܵܐ ܐܸܠܵܘܟܼܘܿܢ ܐܲܢܹܐ ܩܵܕ݇ܡ ܥܹܕܵܬܹ̈ܐ. ܐܵܢܵܐ ܝܘܸܢ ܥܸܩܪܵܐ ܘܓܸܢܣܵܐ ܕܕܵܘܝܕ؛ ܟܵܘܟܼܒܼܵܐ ܒܲܗܪܵܢܵܐ ܕܨܲܦܪܵܐ. 17ܘܪܘܼܚܵܐ ܘܟܵܠܬܵܐ ܒܹܐܡܵܪܵܐ ܝܢܵܐ؛ ܬܵܐ. ܘܗ̇ܘ ܕܫܲܡܸܥ ܐܵܡܸܪ؛ ܬܵܐ. ܘܗ̇ܘ ܕܝܼܠܹܗ ܨܸܗ݇ܝܵܐ؛ ܐܵܬܹܐ. ܗ̇ܘ ܕܒܵܣܡܵܐ ܠܹܗ؛ ܫܵܩܸܠ ܡ̈ܝܼܵܐ؛ ܚܵܝܹ̈ܐ ܚܘܼܪܵܝܝܼ. 18ܐܵܢܵܐ ܒܸܣܗܵܕܵܐ ܝܘܸܢ ܠܟܠ ܕܫܲܡܸܥ ܠܗܹܡܸܙܡܵܢܹ̈ܐ ܕܢܒܼܝܼܘܼܬܵܐ ܕܐܵܗܵܐ ܟܬܵܒܼܵܐ؛ ܕܐܸܢ ܐ݇ܢܵܫܵܐ ܡܲܬܸܒܼ ܥܲܠܵܝܗܝ؛ ܒܸܬ ܡܲܬܸܒܼ ܐܲܠܵܗܵܐ ܥܲܠܘܼܗܝ ܠܡܲܚܘܵܬܹ̈ܐ ܕܝܼܢܵܐ ܟܬܝܼܒܼܹܐ ܒܐܵܗܵܐ ܟܬܵܒܼܵܐ. 19ܘܐܸܢ ܐ݇ܢܵܫܵܐ ܡܲܒܨܸܪ ܡ̣ܢ ܗܹܡܸܙܡܵܢܹ̈ܐ ܕܟܬܵܒܼܵܐ ܕܐܵܗܵܐ ܢܒܼܝܼܘܼܬܵܐ؛ ܒܸܬ ܡܲܒܨܸܪ ܐܲܠܵܗܵܐ ܠܣܵܡܹܗ ܡ̣ܢ ܐܝܼܠܵܢܵܐ ܕܚܲܝܹ̈ܐ؛ ܘܡ̣ܢ ܡܕܝܼܢ݇ܬܵܐ ܩܲܕܝܼܫܬܵܐ؛ ܕܝܼܢܵܐ ܟܬܝܼܒܼܹܐ ܒܐܵܗܵܐ ܟܬܵܒܼܵܐ. 20ܒܹܐܡܵܪܵܐ ܝܠܹܗ ܗ̇ܘ ܕܒܸܣܗܵܕܵܐ ܝܠܹܗ ܐܲܢܹܐ؛ ܗܹܐ؛ ܒܹܐܬܵܝܵܐ ܝܘܸܢ ܓ̰ܲܠܕܹܐ. ܐܵܡܹܝܢ. ܗܹܐ ܬܵܐ؛ ܡܵܪܝܵܐ ܝܼܫܘܿܥ. 21ܫܵܦܵܩܲܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ ܥܲܡ ܟܠܵܝܗܝ ܩܲܕܝܼܫܹ̈ܐ؛ ܐܵܡܹܝܢ.